الأسئلة الشائعة
عن Darbi Teach
شو هي Darbi Teach؟
منصة تعليمية بتربطك بمدرّس لغة إنجليزية موثّق، إلك أو لابنك أو بنتك. بتقارن بين المدرّسين، بتشوف تقييمات الطلاب والأهالي، وبتحجز حصص أونلاين فردية بالأوقات يلي بتناسبك.
شو المواد يلي بتدرّسوها؟
حاليًا اللغة الإنجليزية بس.
لأي أعمار؟
لطلاب المدارس من الصف الأول لحد التوجيهي، وللبالغين كمان. كل مدرّس بيختار فئة وحدة بيدرّسها (صف أول لسابع، صف ثامن لتوجيهي، أو بالغين)، وبتقدر تبحث حسب الفئة. ومن عمر 15 وفوق بتقدر تعمل حساب طالب وتحجز لنفسك.
المدرّسين
كيف بتتأكدوا من المدرّسين؟
فريق Darbi Teach بيتواصل مع كل مدرّس قبل ما ينضم، بيراجع بروفايله وبوثّقه، وبيعمل معه حصة تجريبية مع مشرف من فريقنا قبل ما يستقبل أي حجز حقيقي. المدرّسين الموثّقين بس بيطلعوا بالبحث.
كيف بختار المدرّس المناسب؟
ببروفايل كل مدرّس بتلاقي نبذة عنه، خبرته، الفئة يلي بيدرّسها، شهاداته، سعره، تقييمات الطلاب والأهالي، وعدد الحصص يلي عطاها. وبتقدر تراسله قبل ما تحجز.
بقدر أغيّر المدرّس؟
أكيد، بتقدر تحجز مع أي مدرّس بأي وقت.
الحجز والدفع
كيف بحجز حصة؟
بتعمل حساب: ولي أمر وبتضيف طفلك، أو طالب (من عمر 15 وفوق) وبتحجز لنفسك. بعدين بتختار المدرّس، وبتحجز من الأوقات المتاحة عنده.
كم سعر الحصة؟
كل مدرّس بيحدد سعره، وبتشوفه على بطاقته قبل ما تحجز. مدة الحصة 50 دقيقة لكل الفئات.
في خصم على أول حصة؟
آه، أول حصة مع مدرّس جديد عليها خصم، لعدد محدود من المدرّسين. وبتشوف السعر بعد الخصم قبل ما تأكد الحجز.
بيتغيّر السعر إذا كمّلت مع نفس المدرّس؟
من تاني حصة، السعر بيثبت إلك لفترة، حتى لو المدرّس رفع سعره بعدين.
كيف بدفع؟
بتدفع سعر الحصة قبل موعدها، وفي أكتر من طريقة، منها التحويل عن طريق CliQ أو من رصيد محفظتك بـ Darbi Teach. إذا حوّلت، بترفع صورة التحويل من صفحة الحجز، وبعدها بيتأكد الحجز. وإذا ما دفعت خلال وقت قصير بعد الحجز، بيتلغى لحاله وبيرجع الموعد متاح.
شو محفظة Darbi Teach؟
رصيد بحسابك. أي مبلغ بيرجعلك (استرجاع أو تعويض) بينضاف عليها، وبتقدر تدفع منها حصصك الجاية.
الحصة
الحصص أونلاين ولا وجاهي؟
أونلاين بالكامل، بفيديو مباشر بين الطالب والمدرّس. زر "ادخل الحصة" بيطلعلك بـ"حجوزاتي" قبل الموعد بشوي.
شو بيلزم لحضور الحصة؟
جهاز (لابتوب، تابلت، أو تلفون) فيه كاميرا ومايك، واتصال إنترنت منيح. ويفضّل شاشة كبيرة زي التابلت أو اللابتوب بدل التلفون. والمدرّس لازم يكون فاتح الكاميرا طول الحصة.
شو تقرير الحصة؟
بعد كل حصة لطفلك، المدرّس بيكتبلك تقرير عن شو اشتغلوا وكيف كان أداؤه، بتلاقيه بـ"تقارير الحصص"، وبعد ما تقرأه بتقدر تقيّم الحصة. وإذا إنت الطالب وحاجز لحالك، ما في تقرير: بتقيّم الحصة بنفسك أول ما تخلص.
الإلغاء والتعويض
بقدر ألغي حصة؟
آه. إذا ألغيت قبل الموعد بوقت كافي، بتختار بين موعد بديل أو استرجاع قيمة الحصة كاملة لمحفظتك. وإذا ألغيت قريب كتير من الموعد، بيرجعلك جزء من قيمتها بس، والباقي بيروح للمدرّس تعويض عن وقته. قبل ما تأكد الإلغاء بيبينلك بالظبط كم رح يرجعلك.
شو بصير إذا المدرّس ما حضر أو ألغى؟
بتقدر تحجز موعد بديل مع نفس المدرّس، أو تاخد تعويض على محفظتك بـ Darbi Teach. وإذا غاب المدرّس، بلّغنا من "حجوزاتي" وفريقنا بيتابع.
التواصل والدعم
كيف بتواصل مع المدرّس؟
من الرسائل داخل Darbi Teach. تبادل أرقام التلفون أو أي وسيلة تواصل برّا المنصة ممنوع، حتى نحمي حقك وحق المدرّس.
كيف بتواصل معكم؟
من "دعم Darbi Teach" بالرسائل، أو على info@darbiteach.com.
بدي أصير مدرّس بـ Darbi Teach، كيف؟
تواصل معنا على apply@darbiteach.com، أو راسلنا على صفحاتنا بفيسبوك وإنستقرام.